Executive日記——用家大叫「中伏」 網購煎蛋模具成品似外星人

        所謂愈簡單嘅嘢,愈難做出水準!煎隻靚嘅荷包蛋,大有學問。為咗幫大家煎出一隻完美無瑕嘅荷包蛋,坊間出現咗好多唔同嘅煎蛋模具,有啲形狀仲千奇百趣,非常「盞鬼」!Kelly喺社交網站見到有網民分享,佢喺網店買咗個煎蛋模具,點知大叫「中伏」,成品令一眾網民「笑死」!

        最近有網民喺社交平台分享,佢買咗一個骷髏骨頭形狀嘅煎蛋模具,由模具嘅宣傳圖片可見,需要用到兩隻雞蛋,利用蛋黃做出骷髏骨頭雙眼,煎出嚟嘅成品非常「靚仔」,令人垂涎三尺!點知佢跟住做,煎出嚟嘅成品居然差天共地,好似「煮熟咗嘅外星生物」,Kelly睇見都覺得有啲恐怖,網民忍唔住話「中伏了」。

  帖文引嚟大批網民留言,好多網民都表示「笑死」、「真係好恐怖」、「第一次見到蛋會驚」。但亦有唔少網民話「冇伏喎,比起來更迫真!」、「另有一番風味」。

  原來網上有好多唔同款嘅煎蛋模具,Kelly忍唔住上網尋寶,除咗熱門嘅骷髏骨頭形狀,仲發現咗貓頭鷹、兔仔、男仔頭、太陽等等嘅形狀,網站仲有成品嘅相,雖然唔係全部都好成功,但做出嚟都非常「盞鬼」!啱晒做畀小朋友當早餐!

Kelly Chu


hd