Executive日記——發光馬桶五顏六色 網民笑似足鬼片

  夜麻麻要去廁所,Kelly成日都因為太黑搵唔到個廁所燈掣,科技發達有解救,原來坊間有一種會發光嘅馬桶「神器」,方便大家夜晚唔洗開燈去廁所。Kelly噚日喺社交平台見到有網民分享一款「馬桶發光器」,可以幫大家黑暗中去廁所,但就形容好似鬼片會出現嘅畫面!

  網民分享嘅「馬桶發光器」,只要將發光器勾喺馬桶旁邊,發光器就會幫馬桶「打燈」,仲有好多唔同顏色,除咗有黃色,居然仲有綠色、紅色、藍色、粉紅色等,Kelly望住都覺得有啲詭異。發帖者話:「諗起港產鬼片」,仲hashtag周星馳著名電影《回魂夜》,好多網民都留言話有同感,覺得發光馬桶好恐怖,「六隻色正,夠嚇死我」、「半夜看到會心臟病發吧」,有網民仲話係俚語「屎坑點燈」嘅真實版本O添!

Kelly Chu


hd