Executive日記——文物探知館新展覽 「穿越紫禁城」解構建築奧妙

        中國古代建築博大精深,Kelly之前旅行去過紫禁城參觀,真係非常宏偉!康樂及文化事務署今日起喺文物探知館舉行「穿越紫禁城——建築營造」展覽,展出紫禁城嘅建築模型、斗拱模型、垂脊裝飾等十八件(套)展品,等大家唔使飛去北京,都可以了解紫禁城嘅建築智慧同文化底蘊!

        紫禁城係世界上現存規模最大、保存得最完整嘅木結構宮殿建築群。由今日起至四月七日期間香港文物探知館舉行「穿越紫禁城——建築營造」展覽,展覽以紫禁城嘅建築同工藝為主題,介紹紫禁城嘅由來同建築特色,當中會重點介紹紫禁城內規格最高嘅建築——太和殿,其他重點展品包括明代七踩溜金斗拱模型、清代單翹單昂五踩平身科斗拱模型、乾清門升降龍天花彩畫等等。

  除咗紫禁城之外,展覽仲會介紹香港中式建築嘅風格同特色,包括位於元朗屏山嘅鄧氏宗祠、大夫第、景賢里,等大家可以了解到保育文物建築嘅重要性。展覽仲係免費入場O添!有興趣「穿越」去紫禁城嘅朋友記得留意喇!

Kelly Chu


hd