Executive日記——佛光山香港住持變換曲調好多才 法師派臘八粥領唱「十修歌」

  Kelly身邊有唔少傳媒朋友,噚日就收到風,香港佛光道場到咗星島大樓派臘八粥,住持永富法師除咗同大家講臘八粥嘅起源之餘,仲帶領大家用唔同嘅曲調唱「十修歌」,真係好warm啊!

  翻查資料,原來每年農曆十二月初八係釋迦牟尼佛成道嘅紀念日,而十二月又係中國嘅臘月,所以呢日就係「臘八節」啦。傳說釋迦牟尼未成佛前,喺雪山修道六年,重返人間後接受牧女嘅乳粥供養,恢復元氣與體力,經過四十九日嘅考驗,終於喺十二月八日開悟,成為佛陀。後來呢日食臘八粥就成咗中國嘅一個習俗,已傳承咗二千幾年啦!

  Kelly仲收到朋友嘅錄音,噚日佛光山香港道場住持永富法師帶領大家用唔同嘅曲調,合唱「十修歌」,開頭就用電影《黃飛鴻》嘅主題曲《男兒當自強》,中間就轉咗山歌曲調,再用埋包青天嘅曲調,法師認真多才多藝啊!

  最後緊係唔少得派臘八粥啦,朋友同Kelly講佛光道場嘅臘八粥,係有自己嘅配方㗎,多種材料包括米、芋頭等嘅混合,十分融合,無話突出其中一個食材,真係體驗出佛教「融合」嘅精神。朋友仲同Kelly講,食完個人身心都覺得好warm,話如果想食嘅話,可以係今日或聽日去佛光嘅道場攞翻碗試吓!

Kelly Chu


hd