Executive日記——教育局高官晒廚藝 三款美食內有玄機

        教育政策與烹飪看似風馬牛不相及,但教育局就有計將大纜扯埋一齊。昨天教育局喺中華廚藝學院與傳媒茶聚,局長楊潤雄、副局長蔡若蓮同政治助理施俊輝一起下廚,平日無入廚房嘅楊局長煮咗一碟「露絲瑪莉香草蜆肉燴全蛋麵」,而副局長就整「芝士甜柑沙律」,政助就負責「山竹蜂蜜特飲」。

        三樣食品內有玄機,分別代表教育局去年嘅三件大事,好似「露絲瑪莉香草蜆肉燴全蛋麵」係食「露絲/老師」、「殼/學」、「全面/全(蛋)麵」,即係中小學老師全面學位化,大家聽完笑咗。「芝士甜柑沙律」係食「芝/資」、「柑/金」,代表注資大學研究基金;「山竹蜂蜜特飲」就係「山竹」、「蜂/風」、「特/特別津貼」,即係風災特別津貼,味道同賣相都唔錯,難怪楊局長自誇自己叻叻豬。

  蔡副局長憶述,當年佢做班主任,學生幾曳,大家約法三章,確保「人人有書讀,人人有工開(教師)」。佢話,真正有問題嘅學生唔會喺學校搞事,搞親事嘅多數係冇分寸嗰啲,所以要先小人後君子定下底線,唔守規矩嘅就捉嚟「傾偈」。佢仲笑謂,好多中一生有時太肉緊,會嗌錯佢做「媽咪」,唔係Miss!

Kelly Chu

hd