Executive日記——滙豐上世紀豬年鎖匙扣大熱 豬年到!全部都係可愛豬!

        明天就係農曆豬年大年初一,豬年當然講可愛嘅豬啦。Kelly有一個專門收藏香港產品嘅朋友,佢儲埋好多特色嘅豬仔物品,o依家已經好罕見,甚至好珍貴,好似上世紀六十年代由滙豐銀行送給客戶嘅豬年生肖鎖匙扣,已經成為懷舊經典之物啦,仲有好多港產嘅硬膠或軟膠豬仔錢罌同公仔。

        喺中環蘇豪區必列者士街嘅古物名店select 18,出晒名收藏好多港產嘅生活舊物件,店主Mido見豬年將至,同Kelly分享一批港產「豬品」,當中最多人搵嘅,就係滙豐銀行係上世紀六十年代推出嘅豬年生肖鎖匙扣,佢係十二生肖鎖匙扣系列之一,Mido話好多人都想儲齊一套但唔容易,最多人對龍年鎖匙扣情有獨鍾,而今年係豬年,豬年鎖匙扣都好受歡迎!

  Mido又話,上世紀香港仲有工廠生產錢罌同玩具,質地有軟膠、硬膠同埋絨毛,樣子好得意,夠晒本土味,現在已經好難搵到!而佢搵咗好耐先搵到,部份係個人收藏品,部份會賣,睇下大家有冇緣咁話喎。

  講開豬仔錢罌,Kelly媽咪都收埋一個,佢話足足有三十幾年歷史,係一隻全身奶白色兼有彩色花印嘅豬仔,由新華銀行送畀存戶,現在銀行已經冇咗,好有紀念價值。咁好啦,就畀小妹用嚟儲起啲利是錢啦。

Kelly Chu

hd