Executive日記——財神「任何仁」落場 撐新春發財跑

  昨日大年初三「赤口」,Kelly冇去到拜年,去咗「新春發財跑」!呢項新春跑去到第三十八屆,喺山頂舉行,吸引近八百名跑手參加,唔少選手悉心打扮落場作賽,Kelly見到有人化身成消防處吉祥物「任何仁」組隊出賽,搶盡鏡頭。

  呢項新年長跑賽,昨早由山頂廣場開跑,以柯士甸山公園為終點,跑手要按照傳統完成「8」字形賽道,全長七點五公里。Kelly見到唔少選手都悉心打扮,豬年當然唔少得豬仔,有市民帶同囝囝一齊扮豬仔,有人扮財神爺,仲有人變身「任何仁」組隊出賽,非常「吸睛」!

  跑手完成賽事後,可以收到由財神派發嘅「利是」,拎番個好意頭。

Kelly Chu


hd