Executive日記——11年前預測最快2020年變暖冬 林 S i r 親解神預言

  呢個農曆新年,Kelly幾乎日日着住小背心去拜年,天文台台長岑智明都頂唔順,新正頭要開風扇。究竟冬天去咗邊?咁啱社交網呢幾日有人share番十一年前嘅報道——二○○八年,時任天文台台長林超英預言:香港最快二○二○年冇冬天!唔通真係神預言?!

  二○○八年時任天文台台長林超英(小圖)曾預言香港最快二○二○年就冇冬天,仲預言香港寒冷天氣(即十二度以下)嘅日子,一年都冇一日。唔凍嘅冬天,將於二○三○至二○三九年出現。呢篇報道,最近仲俾網民狂share,驚歎神預言!

  前日Kelly特別打畀林Sir求教,佢笑言係被「屈」,皆因佢係講緊二○二○至二○二九年,會有其中一年無十二度以下,又笑言:「其實唔係我講,係天文台講㗎!」林Sir話全球暖化、香港城市化,同厄爾尼諾現象令香港變暖,咁內地嘅空氣污染會令氣溫更高?林Sir話啱啱相反,污染愈嚴重,天空會積聚污染物同塵粒,塵粒會遮擋陽光,反而冇咁熱!

  聯合國政府間氣候變化專門委員會(IPCC)發表報告指,全球氣溫再升攝氏一點五度的話,就將會面臨嚴重災害。故二○三○年之前,煤炭用量必須減少三分之二。林Sir稱報告係千真萬確,呼籲大家減低碳排放,買少啲衫,食當造食物,減少用電,生活由節源開始 !

Kelly Chu


hd