Executive日記——下周五起可愛睡姿有得睇! 「大公仔」將瞓身維港

        三月係香港藝術月,今年搞搞新意思,全球潮人嘅偶像Companion公仔駕臨香港,仲充氣成超巨型,昨天喺大澳海面現身,佢由下個禮拜五起一連十日進入中環海濱區對開,長瞓俾大家睇,載浮載沉喺海上,絕對係打卡嘅好背景。

        呢個展覽叫《Kaws:Holiday》,一個全長三十七米嘅巨型充氣藝術裝置Companion大公仔,喺舊年七至八月率先喺韓國嘅首爾石村湖瞓過一陣,之後再喺台灣市中心放鬆咁坐過一陣,佢喺亞洲巡迴展出嘅第三站,就喺香港中環海濱長廊對出嘅維多利亞港,姿勢就同首爾一樣瞓低,屆時可以欣賞到佢嘅載浮載沉喺海面嘅懶洋洋睡姿。

  呢個大公仔,以黑白灰色作為主調,外貌同米奇老鼠相似,「XX」眼更加係標誌,係美國國際知名藝術家Kaws嘅成名作,擁有好多國際名人粉絲。

  Companion已經完成充氣測試,仲偷步喺大澳現身。佢喺呢個月嘅二十二日會隨領航躉船,從灣仔金紫荊廣場對開海面游到中西區海濱長廊(中環段)對開,跟住就會喺果度瞓足十日,活動由亞洲萬里通贊助,係佢哋二十周年慶祝活動之一。

Kelly Chu

hd