Executive日記——熊本熊牛一大日子 日駐港總領事切蛋糕慶賀

  日本紅爆吉祥物熊本熊(Kumamon),喺本周一生日,Kelly係佢粉絲,竟然唔記得祝佢生日快樂,好彩日本國駐香港總領事館總領事和田大使同一眾使節人員一齊為熊本熊切蛋糕慶祝,並拍片放上社交平台,好多大懵粉絲紛紛獻上遲來嘅祝福!

  熊本熊喺二○一○年誕生,當初熊本縣政府喺九州新幹線全線通車後,為提高熊本縣嘅知名度同推動本土經濟,找來當地嘅知名編劇小山薰堂同設計師水野學設計出熊本熊,作為熊本縣嘅吉祥物來推銷熊本嘅土產同特色。

  Kelly見熊本熊咁可愛,想將佢嘅肖像做成電話繩掛喺電話得唔得呢?喺上年一月起,熊本縣政府允許海外企業使用熊本熊嘅肖像權,但需付商品售價百分之五至百分七嘅版權費,而日本企業只要符合宣傳熊本縣嘅目的,就可以免費使用熊本熊嘅商標。

  原來熊本熊目前喺中國內地、台灣同香港嘅官方中文名稱叫「酷MA萌」,熊本縣政府有意把這個名稱改為「熊本熊」,以加強宣傳喺熊本縣嘅吉祥物,預計從本月十九日起改名。咁就啱啦!Kelly叫慣咗熊本熊,已經改唔到口﹗

Kelly Chu


hd