Executive日記——「創新行善」比賽 老闆配合做善事 打工仔捐工資可早收工

  Kelly經常買旗仔做善事,估唔到現在做善事都講求創新手法。公益金喺大專學界舉辦咗一個「創新行善」比賽,分為籌款組以及社創組,籌款組嘅冠軍嘅得獎意念係「公益鐘,早收工」,只要打工仔捐一小時工資,老闆就批准佢哋早一個鐘下班,既有趣又有創意。

  公益金為慶祝五十周年,特別舉辦「實踐.社創」社會創新策劃比賽,總決賽上周末喺香港兆基創意書院舉行,由本地大專生組成嘅六支隊伍,憑着創新嘅籌款同社創計劃,勝出比賽。籌款組冠軍隊來自教育科技學院(THEi),成員Hannah同Kelly講,捐錢嘅首要條件係有經濟能力,所以佢哋嘅目標放喺職場人士身上,靈機一觸,只要打工仔捐出一小時工資,就換取老闆給予早一個小時下班,公司上下齊做善事,不知幾開心。

  Hannah同另外兩位隊員Justin同Ann係THEi嘅四年級學生,一齊讀廣告設計,知道呢個「社創比賽」後,由諗橋到寫計劃書,只喺用咗兩個禮拜,最後奪冠。另外,社創組冠軍由中文大學學生Chan Pui Sze、Jeremy Liu、Yip Pak Ki同香港大學學生Liu Ting嘅意念「病不孤單」勝出,呢項計劃是幫助癌症患者整理藥物嘅收費數據,讓病人可以按負擔能力選擇藥物。

Kelly Chu


hd