Executive日記——警方愚人節搞鬼防電騙宣傳 「黎明」 求救 ? 金像獎代贖金

  愚人節,網上訊息難分真假。Kelly昨天見網上流傳一位自稱「黎明」嘅男子,被蒙着眼,稱自己喺內地被富婆「操控」,禁佢回港出席金像獎,佢仲透過錄音短訊求有緣人喺網上過數代比贖金,「承諾」獲救後送贈金像獎和獎金作報酬。Kelly好奇怪,因為黎明本屆金像獎根本無提名!原來係警方最新嘅反電騙宣傳,真搞鬼。

  「我係黎明,我喺內地被富婆操控,逼我拍劇,唔該你用網上過數方法畀我吖,畀我脫身返嚟香港參加金像獎。」有「市民」聲稱收到這條錄音,聲音語氣似足黎明,且報酬豐厚:「成事之後,我會同評審講,個獎同獎金都歸你。」但據Kelly所知,本屆金像獎黎明好似無任何提名喎。

  小妹周圍打聽,先知係警方facebook昨日趁愚人節搞吓笑,乘機呼籲市民提防電騙。搞笑嘅係,片尾係黎明真身都收到這條求救短訊,聽完佢一臉不屑:「真係當我懵仔魚呀?我邊會拎到金像獎吖!」出帖後,獲得好多個like同分享。

  黎明官方facebook都有轉貼:「本人或你本人都最憎俾人呃!提醒大家唔好做懵仔魚,一年得一日係愚人節,冇人想同自己額外慶祝多幾個愚人節,提防被騙!」

KellyChu


hd