Executive日記——場景充滿本地特色 本地漫畫雕塑同你互動合照

  Kelly呢個禮拜最期待嘅畫面終於出現啦!有本地漫畫家怪叔叔Cuson(盧熾剛 )、林祥焜、貓室同江記,仲有殿堂級漫畫家黃玉郎、馬榮成、劉雲傑、司徒劍僑等等,一眾漫畫界勁人齊齊現身,見證灣仔海濱長廊嘅「香港動漫海濱樂園第二期」開幕,十七件全新嘅本地漫畫雕塑登場,任大家打卡,仲可以玩埋勁有趣嘅「互動合照」。

  Kelly昨午去灣仔金紫荊廣場旁邊嘅海濱長廊,參加由香港動漫畫聯會主辦、「創意香港」贊助嘅「香港動漫海濱樂園第二期:《漫活-細味漫畫家的生活》」活動,有十七個本地動漫嘅新角色登場,包括橫刀、文地貓、路邊攤等,必定成為漫畫迷和遊各嘅打卡熱點,小妹亦不停咁影相,放上網分享呃Like。

  第一期原有嘅十九個本地動漫角色,好似老夫子、丁丁企鵝同咳神等,以全新形象展出,最勁係每個雕塑都有獨特嘅AR拍攝效果,Kelly 下載咗樂園最新嘅app,就可以同角色嚟張「互動合照」!場景夠晒本地特色,其中一有個係「打小人」,勁有趣。

  「香港動漫海濱樂園」一期兩年前落成,成為灣仔海濱地標之一,紀錄入場人次超過三百萬!

  大家有時間都快啲去同動漫人物一齊「打小人」啦。

KellyChu


hd