Executive日記——在此與情人親吻祈求愛情永固 聖母院前一圓點 法國人的中心

  Kelly昨天未瞓醒,手機中嘅巴黎聖母院大火訊息就鋪天蓋地而來,好心痛,好希望呢個咁重要嘅建築文物快啲復修好。不期然想起喺聖母院前地有一個金屬點,被視為法國人嘅中心點,好多情侶會企喺上面接吻,祈求愛情永固。

  聖母院嘅雙塔建築,係巴黎重要嘅地標,每年都吸引全球遊客慕名前往。

  Kelly年前喺夜晚時份到訪,喺燈光照耀下,錯落嘅陰影突出浮雕嘅輪廓,個教堂更顯神聖同華麗。

  相比聖母院本身,鮮為人所知嘅係,教堂前地有一塊被稱為Point Zero(巴黎零點)嘅八角形黄銅板,雖然佢喺一片混凝土上,唔太顯眼,但大有來頭。

  Point Zero不起眼,好多遊客未必搵到,但法國人視佢為國家嘅中心點,用以量度法國同世界各地嘅距離。

遊人拋硬幣許願

  對於法國人而言,呢個點唔單止喺地理嘅中心,仲被視為法國嘅文化中心點,好多人以不同嘅方式紀念到此一遊,最廣為人知嘅就係拋硬幣許願,或者與情人站喺中心點上親吻,以求愛情嘅長久。

  小妹就曾站在Point Zero上拍掌,聽到迴音,感覺好浪漫。

KellyChu


hd