Executive日記——心穎安仔爆「偷食」九巴廉署齊抽水

  娛樂圈爆震撼性緋聞,藝人黃心穎同許志安喺的士上激吻短片流出,成為熱話,亦引發網民創意,大量嘅改圖喺網上瘋傳,巴士公司改圖抽水,呼籲「車廂唔畀食嘢是常識吧」。而廉署唔執輸,提醒市民「邊有咁易走得甩?」,抽得絕靚。

  Kelly收到朋友發過來嘅改圖,好有創意又好笑。有網民將黃心穎男友馬國明早前收視率高嘅劇集《降魔的》劇照改圖,馬國明繼續係的士司機,不過後座乘客就變成許志安同黃心穎,跟住佢回頭一看,表情簡直可以話係震驚。有網民仲戲稱佢開嘅係「降魔綠的」,意指佢被戴綠帽。

  令Kelly估唔到嘅就係連九巴都出來抽水,以卡通圖案提醒市民唔好係車廂內「偷食」(小圖),入面嘅兩個主角一個帶cap帽,一個帶口罩,左下角嘅時間都影涉緊呢條引起全城轟動嘅十六分鐘短片,最後仲要好抵死咁hashtag話:「車廂唔畀食嘢是常識吧」,真係抽水抽到維港都乾埋。

  廉署喺facebook貼圖抽水,一張周圍黑曬,凈係睇到主角嘅圖片,配文就提醒市民勿貪污,「咪以為黑蚊蚊冇人知 做過梗係有痕跡」,帖文仲以《Cheat精Cheating斷到正》為題發文,真係好抵死!

KellyChu


hd