Executive日記——億元金多寶延至周六攪珠 「43」「49」係幸運冧把

  呢排Kelly嘅同事日日念念有詞,原來佢諗緊買邊六個號碼,話中咗六合彩提早退休。本周二六合彩復活節金多寶八千萬頭獎無人中,獎金撥入下期,如果一注獨中,可以攞走一億蚊,馬會見投注氣氛熱烈,特別將原定今晚嘅攪珠,順延至呢個禮拜六夜晚九時半,等大家有充足嘅時間投注。

  Kelly睇番以往馬會一共十次獎金達一億或以上嘅攪珠結果,發現咁多次以來都唔係一注獨中,所以如果大家真係咁好彩,一注獨中,唔單止可以一夜成億元富豪,仲會創造馬會歷史!

  Kelly問過喺馬會朋友,原來十次一億或以上頭獎,除咗兩次無人中頭獎之外,其餘八次共由二十七注瓜分,當中最多人買單式,共十二注,跟住就買七個字複式或八個字複式,各有六注同五注。至於抽中嘅「冧把」,「43」同「49」各被攪出四次,可說係「幸運冧把」。

KellyChu


hd