Executive日記——旅發局新主席妙喻 百變pizza吸百客

  旅發局新任主席彭耀佳喺本月履新,昨天佢同傳媒高層會面,呢位洋行大班好熟書,對旅客數字同分析瞭如指掌。佢話,自己首選嘅外遊地點係日本,原因係每次去完都開心而回,所以佢好想香港旅遊業都畀到遊客賓至如歸嘅感覺。佢仲以公司旗下嘅Pizza Hut作比喻,話意大利薄餅嘅餡料要多變好味,先至吸引到不同嘅客人回頭幫襯。

  旅發局新任主席彭耀佳係英資怡置系嘅高層,屬於打工皇帝。佢認為旅行最緊要開心,佢同好多香港人一樣,首選去日本,因為日本四季有不同景致,食物好,多嘢玩,仲有日本人好有禮貌,畀到外國人賓至歸嘅感覺,「好似喺機場搭三千五百日圓嘅巴士,接送人員都鞠晒躬。」佢覺得香港人可以做得好啲,鄰近台灣人都好有禮貌,呢種侍奉文化的確需要多啲推動。

  講到對旅遊業發展睇法,彭耀佳話,要吸引高消費客。喺佢心目中,冇所謂「典型客」嘅,旅遊業要提供不同嘅選擇,畀唔同嘅客人,就以佢多年前曾做主管嘅Pizza Hut作比喻,唔講唔知,平均每周有一百萬人次光顧,吸引到咁多客人,佢話最重要係總有一款食物,適合不同嘅客群。旅發局總幹事劉鎮漢食住呢個比喻話,局方推出旅遊產品嘅時候,要好似焗Pizza,要添加唔同嘅topping(餡料),做到多元化,咁就可以迎合不同旅客嘅口味啦。

KellyChu


hd