Executive日記——多啲休息就係最好禮物 「阿媽自由瞓」 表揚母親辛勞

  嚟緊嘅周日(五月十二日)係母親節,大家有冇諗過媽咪最希望收到咩嘢禮物呢?平時媽咪咁忙碌,照顧一家人,付出自己嘅心血同勞力,真係好攰。有團體就發起一個好有意思嘅運動,叫做「阿媽自由瞓」,鼓勵大家多關心媽咪嘅辛勞,並且叫佢休息多啲。

  唔講唔知,原來「照顧者平台」喺今年國際婦女節(三月八日)發表一項問卷調查,發現媽咪最希望嘅假期活動就係瞓覺。所以,香港婦女中心協會、天水圍社區發展網絡同循道衛理觀塘社會服務處神愛關懷中心三個機構,昨天一齊喺明愛專上學院舉行一個名為「阿媽自由瞓」嘅活動,吸引五十個家庭參加,等各位媽咪喺將軍澳翠嶺里明愛專上學院校舍一齊瞓吓覺,並且分享身為照顧家庭者所面對嘅壓力。

  呢個活動嘅目的,係想向社會表達,媽咪作為照顧者,尤其要養育細路仔嘅,面對好大嘅壓力,連休息都係奢侈。三個機構都呼籲各界向媽咪,尤其是基層嘅一群,提供更多支援,等媽咪可以每個星期有一日休息日,等佢哋有少少私人時間,發展下自己嘅興趣。另外,可以增加照顧者津貼,肯定佢嘅貢獻同價值。不過 ,三個機構都認為,最重要就係政府提供足夠嘅託兒名額,咁媽咪就可以輕鬆得多。

Kelly Chu


hd