Executive日記——五千善信齊禪修紓壓

  「慶祝佛曆二五六三(二○一九)年佛誕節吉祥大會」上周六起一連三日喺紅磡體育館舉行,噚日趁住最後一日,小妹知道好多善信把握機會去參與禪修!

  紅館噚日早上人頭湧湧,有超過五千名善信齊集紅館,參加由香港佛教聯合會今年「佛誕節吉祥大會」首次舉辦嘅禪修體驗活動,咁多人一齊禪修,真係好壯觀。參加者喺活動嗰日暫時放下手機同日常繁忙嘅工作,喺三位法師——寬運法師、宏明法師同衍空法師帶領下禪修!

  活動由早上十點開始,三位法師先分享禪修嘅原理,之後大家齊齊禪修,活動喺十二點半圓滿結束。有參加者同小妹分享感受,佢話禪修唔單止可以紓緩壓力,仲令到佢可以感到前所未有嘅寧靜平和、放低雜念,佢仲話禪修一刻有種活在當下嘅感覺!Kelly聽完都好想試吓!

  呢幾年都興起禪修熱潮,但喺香港咁大型嘅禪修,小妹都係第一次見!

Kelly Chu


hd