Executive日記——深水埗節巡遊 古董車出動

  繼旅遊發展局去年喺深水埗舉行咗一個「大城小區」推廣項目,推介當區地道特色之後,唔單止多咗遊客去深水埗玩,仲多咗港人去行街消費。今年深水埗各界慶典委員會再接再厲,昨日舉行咗「深水埗節大巡遊」,有幾十架古董車參加,好多車迷睇到眼都唔眨!

  「深水埗節大巡遊」今年係第一屆,活動豐富又特別,好似巡遊除咗有深水埗地區龍獅隊、風笛隊、兒童肚皮舞等表演,仲有古董車參加巡遊。

  小妹同主辦單位嘅工作人員傾過,佢話今次有八架哈利電單車同超過三十架古董車浩浩蕩蕩咁途經長沙灣、南昌街等,沿途街上逼滿人,大人細路都睇得好開心!事關呢啲古董車平時都唔係咁易見到,除咗價錢不菲之外,大多數人都用嚟收藏,唔會輕易揸出街,今次佢哋係自願借出,仲義務做埋司機!

  唔少機構都出力贊助今次活動,包括旅發局,佢哋特登設計咗一對機械人作展示,仲用咗代表深水埗嘅代表色紅綠色。而香港賽馬會罕有派出「雪特蘭小馬」同大家合照。

Kelly Chu


hd