Executive日記——海洋公園新餐廳 泰北風味美食好吸引

  海洋公園近年主打美食,最近開咗間泰菜餐廳「Ginger Grill爐炭燒」,請來三位泰北大廚主理,Kelly昨天去試菜,首次嚐到清新而不濃稠嘅冬蔭公湯,同超級好味嘅船麵!

  海洋公園副行政總裁李繩宗請Kelly去Ginger Grill試菜,間餐廳喺公園入口左邊,以前個位置賣紀念品,現在縮細咗,騰出空間開咗呢間泰菜館。李總同小妹講,餐廳設計經精心安排,可以間隔分成兩半,平時畀大眾用餐之外,仲可以租畀公司搞小型宴會,全場可以容納一百二十多人。

  環境好,食品頂級,Kelly最欣賞冬蔭功湯,泰北嘅煮法零舍唔同,一般冬蔭功湯橙紅色兼好多紅油浮面,泰北冬蔭功湯水好清,又有濃濃嘅海鮮味,酸酸辣辣,清新又開胃,食完唔會飽滯!船麵好有特色,湯底以豬骨熬製,好正!餐廳仲備有長炭爐,火力十足,用來做炭燒牛扒,大廚燒得好靚,外面熟裏面粉紅色,肉汁多鮮味,一大件夠六個人食,都只係一千蚊多啲,出去高級餐廳就起碼要一千六到二千先歎到!李總話,仲申請緊係餐廳門口放餐桌,一旦成事,可以配合戶外表演活動,等遊人享受更好嘅氣氛。

Kelly Chu


hd