Executive日記——星島校際辯論總決賽 司長妙語話似決戰少林

  上星期Kelly去咗灣仔伊館現場睇學界盛事「星島全港校際辯論比賽」總決賽,今屆參賽隊伍有二百零八隊,要經過五個多月逾百場賽事,先有機會打入總決賽,少啲實力同耐力都隨時被OUT,最後藍田聖保祿中學及可風中學(嗇色園主辦)分別喺中英文組賽事稱王,真係實至名歸。

  Kelly喺現場最期待嘅畫面,除咗係見證冠軍隊誕生,仲有幾位份量十足嘅嘉賓,佢哋嘅演講都好精采。今年大會請到政務司司長張建宗親臨主禮及頒獎,佢致辭時就妙論星島辯論比賽好似少林寺,參賽隊伍係十八羅漢,過關斬將,練出一身好辯才,仲話對同學日後投考政府工有幫助。佢強調唔係叫同學為考政府工而去參加辯論,但有辯論經驗,對日後向大機構求職有着數。

梁卓偉叫同學發音唔好懶

  港大李嘉誠醫學院院長梁卓偉教授及資深大律師譚允芝分別擔任中英文組評講。梁教授點評時抽水近期熱爆嘅海外醫生來港執業爭議,話對班醫生嘅辯才歎為觀止,仲講笑話醫生其實唔應該能言善辯,否則會畀人話係oral surgery得把口無料到!佢又提醒同學發音千祈唔好懶,否則「外資」變成「愛滋」就大件事。梁教授口才咁好,拍得住班辯論精英有餘啦。

  講返賽果,藍田聖保祿中學今次係第三次攞中文組冠軍,好多師姐及同學專程到場支持,知道賽果後仲齊齊上台大合唱校歌,場面開心又感人。第一次奪得星島辯論賽英文組冠軍嘅可風中學(嗇色園主辦),更係激動又興奮,高漲情緒感染全場。想感受吓總決賽嘅精采盛況?可以上星島辯論facebook專頁,一次過睇晒當日多條精采片段。

Kelly Chu


hd