Executive日記——「失敗博物館」 鼓勵青年勇往直前

  Kelly去過唔少博物館,大多數都係睇文物藝術品,第一次聽到以失敗作為主題嘅博物館。亞太區青年發展基金搞咗個失敗博物館,要鼓勵香港青年勇於面對自己嘅「失敗」,仲請咗現職金鐘JW萬豪酒店中餐行政總廚鄧家濠同亞洲拳王曹星如教練劉志遠分享,好有意義!

  「失敗博物館」昨日開幕,大家唔好睇博物館以「失敗」作為主題好似播放負能量,其實佢好有意義,因為團隊在過往數個月公開徵集失敗故事,話畀大家知失敗同挫折個個人都試過,佢哋仲想特別同應屆考生講成績高低只是一時三刻嘅事,即使遇到挫折,都可以繼續向前咁話!

  佢哋請咗現職金鐘JW萬豪酒店中餐行政總廚鄧家濠(見圖)分享,原來佢初出茅廬嗰時,人工得五千蚊,仲返得兩個月就俾人炒!佢更加試過喺中菜酒家做員工廚師時,俾人話佢煮嘢難食,寧願食腐乳都唔食佢煮嘅菜,但佢冇因而放棄自己嘅夢想,最後終於煮到大家都鍾意食嘅菜!

  亞洲拳王曹星如教練劉志遠為咗喺香港推廣拳擊運動食咗唔少苦頭,曾經佢舉辦嘅一場拳擊比賽蝕咗成三十萬,但最後終於成功推廣風氣,曹星如嘅拳賽門票亦一掃而空!小妹睇完都覺得好勵志,「失敗博物館」會喺即日至六月七日舉行首場公眾展覽,地點喺柴灣青年廣場,大家可以留意!

Kelly Chu


hd