Executive日記——暖心餐廳邊食邊傾助紓緩情緒壓力

  香港人生活壓力大,難免有好多負面情緒,而Kelly明白好多人唔開心都難以啟齒,好在亞洲催眠治療及輔導協會搞咗個「暖心餐廳」,畀有需要嘅人一邊享用美食一邊同輔導員傾談,真係好warm!

  好多香港人一樣生活繁忙,好容易忽略自身嘅情緒需要,特別係老師,而政府註冊非牟利團體亞洲催眠治療及輔導協會,為咗紓緩香港人情緒困擾問題,就特意搞咗個「暖心餐廳」,重點對象仲係工作壓力沉重嘅教師,等佢哋可以喺環境好嘅餐廳邊食邊同輔導員傾,夠晒貼心!

  Kelly知道,亞洲催眠治療及輔導協會會先登記有需要人士,仲會有專人了解個案安排適合而且同性別嘅義務輔導員到餐廳會面,大概會傾九十分鐘左右。而大家唔好以為「暖心餐廳」係一個固定嘅地方,其實「暖心餐廳」係由二十四間餐廳支援計劃提供場地,可以話真係做到「走入社區」,而呢個計劃首年目標為三百人提供服務。大家如果有需要,可以先喺亞洲催眠治療及輔導協會網站或者電話登記,費用全免!小妹都希望呢個計劃幫到更多人!

KellyChu


hd