Executive日記——新版蝦餃更見清新鮮味 七名廚炮製少鹽少糖美食

  Kelly為食,鍾意追住啲名廚食好西,但都注重要食得健康。好多人誤以為要健康就要犧牲味覺享受,原來未必,事關城中七位名廚齊齊推廣少鹽少糖,佢哋應邀出席由食衞局、降低食物中鹽和糖委員會同食安中心嘅活動,親自炮製少鹽少糖美食!其中添好運點心專門店麥桂培師傅示範少鹽蝦餃,比坊間嘅出品清新鮮味好多。

  呢次七位名廚師一齊登場,個個大名鼎鼎,分別係李文基師傅(富嘉閣)、陳國強師傅(豐生水起)、陳啟漢師傅(中華廚藝學院)、許美德師傅(百樂潮州)、麥桂培師傅(添好運)、蕭秀香師傅(三姐海鮮飯店)同鍾志強師傅(御進私房菜)。Kelly之前都試過佢哋手藝,真係好正!

  呢次活動,Kelly最鍾意食添好運點心專門店培哥示範嘅蝦餃,佢話蝦餃減少落二、三成鹽,但不減鮮味。培哥分享秘訣係材料要新鮮,咁就唔使用咁多鹽加味,滋味一樣非凡!

  係人都知道食得太鹹,會導致高血壓、致命性中風同冠心病,食得太甜會引致肥胖同蛀牙。咁如何調味呢?培哥教路用天然調味料,好似多用薑同蒜增味,或以南瓜蓉加甜,咁就食得更健康啦。

Kelly Chu


hd