Executive日記——約埋老友搭高鐵出遊 馬主席親帶團歎潮汕靚牛肉

  港鐵主席馬時亨偷得浮生半日閒,約咗一班朋友同傳媒老友搭高鐵,親自帶團上潮汕,除咗遊覽當地景點,當然要食出晒名嘅美味靚牛肉啦,佢仲示範將個碟反轉,啲牛肉新鮮到黐住個碟,反地心吸力唔會掉落枱上。

  馬時亨約咗行會成員林健鋒等老友,偕同一批傳媒朋友,一齊搭高鐵去潮汕,除咗遊當地景點嘅韓江,仲參觀咗汕頭大學,大家玩飽之後,當然要食餐好嘅。

  潮州牛肉出晒名,新鮮到會黐住個碟,反轉個碟十秒,啲牛肉都唔會跌落嚟,馬時亨即席示範,果然如此。唔講唔知,潮州靚牛可切成十二個最靚嘅部位,供煮各式佳餚美食,至於其他位置就用嚟打牛丸。

  馬主席話,每天有好多班高鐵來往香港同潮汕,吸引好多潮州人乘搭南下香港,搞到來港車票好緊張,而由香港去潮汕嘅高鐵就較容易買車飛,車程兩、三小時到埗,就可以享受潮汕眾多美食,以人頭計都係一百多蚊。佢又話潮州名物牛肉係唔會出口嘅,香港食唔到,大家想歎就要搭高鐵嘞。

Kelly Chu


hd