Executive日記——UNIQLO閘門被撞彎 KAWS聯乘潮T 中港粉絲瘋搶

  昨早Kelly行經連鎖服裝店UNIQLO,未開門就排長人龍,原來店方聯乘潮流品牌「KAWS」推出新T恤,吸引粉絲入貨。內地仲誇張,大批後生仔未等閘門拉起,就爬入去搶T恤,有網民形容好似喪屍爬行咁嘅瘋狂。經一輪搶購,中港兩地嘅T恤都被搶光。

  「KAWS︰SUMMER」UT系列昨日喺UNIQLO中港台全線分店開賣,小妹昨早見奧海城分店門外排了長人龍,人人入去買。內地人更瘋狂,網上流傳上海、杭州等地嘅UNIQLO嘅開門情況,從影片可見店閘開咗一條縫隙,班後生仔就彎身爬入店,連鐵閘都被撞彎,貨架上KAWS T恤都被一掃而空,連模特兒公仔身上嘅都被脫下。

  有網民笑稱,場面好似《屍殺列車》、「笑死,閘都彎埋」、「搶包山咁」;亦有人話大部份都是黃牛黨,搶購T恤炒賣。Kelly問過香港UNIQLO店員,佢話網上「KAWS︰SUMMER」UT系列已售罄。至於實體門店有冇貨,大家就要碰一碰運氣啦!

  另外,今年三月底《KAWS:HOLIDAY》巨型公仔喺中環對開海上瞓身展出,吸引好多人打卡。當時旅發局向傳媒朋友送上一個《KAWS:HOLIDAY HONG KONG》公仔,Kelly昨天上網發現呢個公仔掀起炒賣熱潮,有人以近二千元放售。有玩具公仔嘅店員對小妹講,個公仔現時抄價接近二千蚊,可見KAWS人氣極高。

Kelly Chu


hd