Executive日記——KAWS X UNIQLO袋 網上熱炒貴三倍

  潮流品牌KAWS同UNIQLO聯乘推出T裇同手提袋,內地出現瘋搶場面,香港UNIQLO多間分店過去兩日亦大排長龍。Kelly昨早去UNIQLO排隊,可惜買唔到個心儀手提袋,上網一睇,發覺炒風熾熱,有人喺本地拍賣網放售手提袋,開價高原價三倍,賣四百蚊一個,而內地淘寶亦賣貴兩倍,十分誇張。

  喺YAHOO!拍賣網,有賣家將原價九十九港元嘅手提袋標價至四百元,炒貴咗三倍,而T裇價錢亦由九十九元炒高至最貴三百元。Kelly再上淘寶網,手提袋同T裇都炒高到約一百七十元人民幣。

  KAWS同UNIQLO前幾次聯乘都掀起熱潮,但今次最熾熱,可能同雙方係最後一次合作有關。由於UNIQLO官方未公佈返貨嘅消息,相信炒價仲會有上升空間。

  Kelly昨早先到UNIQLO大埔超級城分店,見到一個疑似炒家嘅年輕人,竟然拎住部手推車去掃貨,畀錢時仲手持約五十張疑似網上訂貨單據,大手入貨,好誇張。小妹買唔到個手提袋,即刻去奧海城分店碰運氣,去到見到有三十人排隊,當中一半人講普通話,睇嚟香港亦係內地粉絲同炒家嘅入貨熱點。

Kelly Chu


hd