Executive日記——同爹哋慶祝父親節啱晒 迪士尼新菜單 中西合璧有睇頭

  好多朋友話,去香港迪士尼公園開心玩一轉,必定食番餐fine dining。近日好多人就喺迪士尼樂園酒店晶荷軒訂定枱,話有新美食登場,同爹哋慶祝父親節咁話。Kelly特登去試菜,大廚中西合璧,創意爆燈,仲試到佢哋秘製嘅古早荔枝醬。

  迪士尼朋友話,廚師團隊經常炮製合時美食,最近中西餐大廚一齊發功,分別推出多款新美食,中式有杏汁海螺燉豬腱湯,西式就有龍蝦忌廉湯,平排放一紅一白,兩款都好滋味,顏色對比好有趣。其他美食有平有貴,好似龍蝦披薩,大人小朋友見到一定嘩一聲,而二十頭吉品鮑就啱晒啲大豪客。O依家訂龍蝦餐仲有優惠,先到先得,想爹哋開心過父親節,就快啲行動。

  Kelly早前試過佢哋嘅全鴨宴,客人反應好好,尤其佢哋好鍾情一款荔枝醬,好多人問有冇得賣,園方靈機一觸,經過幾個月籌備,終於推出自家秘製嘅古早荔枝醬,大廚話可以搽麵包,簡單又好味,又可以配煎牛扒等肉類,以微酸中和脂肪,係一流嘅配搭。

  Kelly就諗緊用嚟配燒雞翼,爹哋一定鍾意食。

Kelly Chu


hd