Executive日記——「心思心意」郵票月中發行 可將自己個靚樣印上去!

  Kelly好耐無親手寄信,但昨天知道香港郵政將會發行新一批「心思心意」特別郵票,提供心心、花朵、星星、銀色雷射球、鑽石等框框同圖案,等大家提供相片自製私人化郵票,咁就可以向朋友仔憑郵票表心意,非常之潮,小妹準備訂購一套,唔再用手機發信息,回味親手寫下信畀朋友嘅樂趣。

  集郵迷注意,香港郵政為紀念出席「中國2019世界集郵展覽」活動,將於本月十一日發行新一批「心思心意」特別郵票,郵票樣式印上可愛嘅心心、花朵、星星、銀色雷射球及Kelly最愛嘅鑽石等圖案,加上鏤空同燙壓效果,以及水彩圖鴉的效果,成張郵票都「High Class」得來又有「文青」Feel。最厲害是可以支援不同情況用,共六款設計,當中包括四款「本地郵資」及兩款「空郵郵資」郵票。

  Kelly相識滿天下,所以本地同空郵,小妹兩個都要!自古以來,印落郵票嘅都是名人,現在你同我都有機會自製郵票!Kelly決定本月十一日要將自己的靚樣印上郵票,咁樣寄信畀朋友,今次仲唔係我最威!

  另外,「中國2019世界集郵展覽」將於六月十一日至十七日喺湖北省武漢市舉行,特別發行一款郵票小型張,而郵展展徽係信鴿和武漢地標「黃鶴樓」,仲有香港與武漢嘅建築剪影,象徵兩地在集郵文化上交流互動。

Kelly Chu


hd