Executive日記——免費贈飲品一杯 樂隊駐場氣氛濃 帝苑八折半自助餐賀父親節

  聽日就係父親節,Kelly已經準備好禮物,仲未準備嘅可以參考日本一個父親節調查,搵下靈感。而香港其實唔少酒店都有優惠,可以同爸爸食番餐。

  日本一個禮品介紹平台早前就訪問咗一百位父親,問下佢哋至今收到最令人開心嘅禮物同希望子女喺父親節為自己做啲咩。結果原來受訪嘅父親就最鍾意收信同銀包。而且,佢哋亦希望同子女出街食飯同開家庭派對。

  相信父親節前後都會好多人出街食飯慶祝,自助餐係一個唔錯嘅選擇。帝苑酒店嘅J's酒吧喺父親節推出半自助晚餐,o依家訂座仲有八折優惠,每位爸爸更有免費父親節飲品一杯,有樂隊現場表演,好有氣氛。

  半自助晚餐供應多款海鮮,例如長腳蟹腳、鮮蝦、青口等。主菜就可以選擇法式扒牛柳併大蝦配黑胡椒汁、慢煮春雞配黑松露薯蓉及燒蘆筍或者日式麵豉醃挪威三文魚配南瓜蓉。甜品仲有意大利軟芝士餅、鮮果拿破崙同馳名蝴蝶酥等。

  無論大家點樣慶祝,心意最重要。Kelly希望各位父親身體健康,生活愉快!

Kelly Chu


hd