Executive日記——修例風波導致情緒不穩 紅十字會好貼心 幫市民身心輔導

  一場反修訂《逃犯條例》爭議,好多人睇完新聞都唔開心,有部份朋友仲感到不安,唔想再睇有關新聞。Kelly替佢哋擔心,因為呢啲可能係情緒受創傷嘅反應。小妹呼籲大家有需時候去搵香港紅十字會或災後心理輔導協會(PCCN)幫手,尋求情緒下嘅支援。

  香港紅十字會安排咗臨牀心理學家及心理支援服務義工由上周三起接聽受困擾市民嘅電話,有關服務延長至昨晚十點。截至前晚十點為止,熱線一共接獲六十四個求助電話。紅十字會好貼心,喺昨日大遊行期間設立急救站,為市民提供身心支援服務。

  災後心理輔導協會嘅熱線,按聯合國響緊急情況下使用嘅指南,為受助者評估狀況和快速治療,服務時間由周一至周日嘅早上十時至晚上十時,開放至七月三十一日。協會話,截至昨午一點為止接到四十一宗求助,其中有人情緒不穩,經創傷心理治療後回復平靜。

  英國註冊藝術心理治療師梁靜韻對小妹話,近日收到很多家長同老師嘅查詢,問如何排解學生同小朋友嘅不安情緒。佢話,比較多係參與咗示威嘅小朋友嘅「即時反應」,佢哋之後夢見衝突場面。梁靜韻建議,要留意身邊朋友嘅負面情緒,最好安靜咁陪伴對方,若佢情緒持續受困擾,食欲又不振,情況持續一至兩星期或以上,最好搵專家傾吓。

Kelly Chu


hd