Executive日記——為遊行人士送上心意 火鍋店老闆好有愛一日派咗16箱水

  周日反修訂《逃犯條例》大遊行,有二百萬人參加,人數龐大,秩序井然,反映香港公民質素好高。當日仲有好多有心人自發向遊行人士送上心意,好似一間食店就免費派發樽裝水。Kelly問過老闆,佢話略盡綿力,希望幫市民發聲,等政府聽到,快啲解決今次爭議就好。

  Kelly問過呢間位於維園附近嘅火鍋店負責人,佢話見到遊行人士行到身水身汗,所以預備咗十六箱樽裝水送界佢哋,希望佢哋可以帶住呢份心意,將港人嘅聲音話畀政府聽!被問到介唔介意生意受大遊行影響,佢就話如果解決唔到呢個爭議,日後嘅生意仲有更大嘅影響!

  另外,有網民於facebook群組「香港突發事故報料區」上載圖片,可見前晚遊行人士經過銅鑼灣同灣仔一帶嘅街頭後,街上回復一片平靜,一件垃圾都無留喺街上,非常之乾淨,樓主讚歎:「之前有二百萬人經過, 如此清潔,如此整齊, 如此高質素,如此香港人!」

  有參與遊行嘅網民指,一班學生、義工團隊沿途一路清潔路面,甚至幫忙回收。唔少網民留言稱讚香港人,「向有質素香港人致敬」、「乾淨過平時」、「香港人值得驕傲」、「高質香港人遊行完美演繹,無人能及」Kelly都要畀like同多謝一班香港人!



Kelly Chu


hd