Executive日記——加國200萬人賀速龍巡遊爆槍擊案 港人和平遊行抵讚

  香港有二百萬零一人大遊行外,遠在彼岸嘅加拿大多倫多昨天一樣有二百萬人上街,但人哋唔係反對政府法案,而係慶祝多倫多速龍隊贏得加國史上首個NBA總冠軍,但喺遊行中突然響起槍聲,情況混亂,小妹睇返香港嘅大遊行就非常文明,真喺為港人感到驕傲!



  速龍隊贏咗NBA總冠軍,加拿大舉國歡騰,多倫多市政府仲宣佈將六月十七日名為「We The North Day (北境之王日)」嘅官方公眾假期,吸引好多人喺當日參加舉行勝利巡遊,本來大家開心慶祝嘅日子,點知一度響起槍聲,情況混亂,有人受傷,真係令人擔心。多倫多警方仲調查緊事件,未知有無槍擊目標或者涉及恐怖襲擊,小妹希望傷者早日康復啦。

  對比之下,香港人喺上星期日嘅大遊行和平又有秩序,其中一大班示威者讓路畀救護車同巴士,場面似足「摩西分紅海」,Kelly睇到都覺得好感動。仲有好多去大遊行嘅朋友都話,大家好禮貌、無怨言、無推撞、互相打氣,又幫助有需要嘅人,一啲事故都無發生,咁平和嘅場面喺社交媒體上瘋傳,唔少外國人都覺得香港人有質素,香港人真係立下和平遊行抗爭嘅好榜樣!

Kelly Chu


hd