Executive日記——玩千人瑜伽 睇「石頭節」展 「中環夏誌」30節目歡度盛夏

  早排大家去中環金鐘一帶遊行,相信一定行到好㷫,Kelly覺得係時間去中環輕鬆吓,咁推介大家去一年一度嘅「中環夏誌」活動,玩吓遊戲!活動期間將舉行三十項免費大型節目,有「石頭節」藝術作品展 、音樂節等玩到千人戶外瑜伽,無論好動好靜都可以一齊歡度陽光夏日!

  今年嘅「中環夏誌」將會喺呢個月二十六號至九月一日號喺中環海濱活動空間舉行,以「智慧城市」、「藝術文化」、「運動活力」同「嘉年華會」為四大主題,舉行三十項免費大型節目,規模比過往幾屆都要大。

  唔少節目都係首次舉行,好有新鮮感。「石頭節」係常設展覽,展期長達兩個月,會展出過百件由多位藝術家創作,以及來自本港同其他唔同國家兒童創作嘅大小石頭畫作。主辦單位仲會收集過萬幅兒童畫,配合藝術同音樂交流,舉辦各式工作坊同大型活動。

  「中環夏誌」仲有多個特別節目,例如你可以同一千人一齊做戶外瑜伽、喺「Mellow Yellow 音樂節」聽聽悠閒嘅民謠同輕爵士,同喺棒球嘉年華發掘棒球運動嘅樂趣。有興趣嘅你就要上網睇吓心水活動嘅舉辦日期同使唔使預訂啦!

KellyChu


hd