Executive日記——「損海不利己」方案奪海洋公園保育大獎 中學生VR化身小魚宣揚環保

  海洋公園舉辦「第一屆海洋公園國際STEAM保育大賽」,邀請世界各地嘅學生提交創新建議,解決環保議題,結果由一個名字好有趣嘅「損海不利己」方案勇奪冠軍。

  「損海不利己」由明愛粉嶺陳震夏中學嘅同學提出,透過虛擬實境(VR)影片同連串嘅環保產品,推廣環保訊息。該校中四級同學仔黃沚泓話:「科技發達,製作VR片成本偏低,影片以魚類作為第一身視角,呈現珊瑚白化、小魚突然被大漁網捕捉嘅情況,希望公眾理解到,人類對海洋嘅破壞最終亦會由人類承受。」

  除咗VR宣傳片,方案仲送「禮物」。黃同學話,佢教同學用果皮、水和糖製作環保酵素,送畀學校,取代一直用開嘅洗潔精。又有VR 片睇,又派「禮物」宣傳海洋環保,怪不得突圍而出啦。

  另外,保育項目嘅冠軍就由柬埔寨嘅Liger Leadership Academy奪得,同學設計咗人工礁石來保護海牀,免受拖網破壞海洋生態。

Kelly Chu


hd