Executive日記——倪匡同中港台作家齊齊開Talk  今屆書展帶你進入科幻世界

  一年一度嘅香港書展將於七月十七日至二十三日喺會展舉行,今屆主題係「科幻及推理文學」,Kelly第一時間諗起倪匡筆下嘅衛斯理,大會話倪匡會開一個講座,題目係衛斯理嘅科幻世界,科幻小說迷不能錯過呀。

  倪匡多年來未有在書展露面,佢將會喺七月二十一日下午一點喺書展開Talk!主題係「無限時空中追尋無限未來-倪匡與衛斯理的科幻世界」,小妹係衛斯理迷,覺得倪匡筆下嘅衛斯理,故事唔止科幻咁簡單,仲有好多人生哲理,所以一定要去霸個位。

  「科幻及推理文學講座系列」仲會安排中港台科幻小說作家分享創作心路歷程同探討科幻相關主題,包括杜漸、李偉才、葉李華、陳浩基、譚劍、望日、黑貓C等。身兼作家嘅香港科幻會會長李偉才話,科幻小說對作者同讀者嘅要求都好高,作家要有優秀邏輯之餘,仲要關注最新嘅科技同了解這些科技嘅可延伸性。

  港產科幻小說嘅出版量並不多,係比較屬小眾口味。對於今次成為書展主題,佢話有吐氣揚眉之感。

  由貿發局主辦嘅香港書展,已有來自三十九個地區六百八十六家參展書商,係歷屆最多,除咗科幻小說嘅講座,仲有「名作家講座系列」,成班作家包括中國內地嘅閻連科、麥家、劉震雲、馮小剛等;來自台灣嘅平路、朱國珍等;香港嘅代表聞人悅閱等,都係愛書人見偶像嘅好時機。

Kelly Chu


hd