Executive日記——同卡通人物水戰 Pixar水花大街派對 迪士尼解暑大作戰

  夏日炎炎,想同至愛Pixar卡通人物玩水消暑?定一圓公主夢,變身成一眾耳熟能詳嘅公主?今年暑假嚟迪士尼,大人細路嘅願望都滿足到!

  《反斗奇兵四》下個月上映,等唔切嘅粉絲可以由今日起至九月一日先去迪士尼樂園參加「Pixar水花大街派對!」同巴斯光年、胡迪同久違嘅牡羊女寶貝等一眾人物去到美國小鎮大街,載歌載舞,盡情濕身。今年全新升級嘅兩架噴水花車以《反斗奇兵》及《海底奇兵》為主題,可以噴出高達七米嘅水柱,保證大家暑氣全消。若你保住個靚樣同卡通人物影相,記得準備雨褸同遮。除咗玩水,粉絲仲可以去到園內餐廳試下夏日限定嘅「三眼仔紀念杯」、「胡迪魔法球」同「巴斯光年魔法球」。當然,仲有好多《反斗奇兵》嘅新產品等緊大家。

小朋友化身小公主

  迪士尼嘅新城堡要出年先落成,但七月一號開始城堡區入面將會開設「童話藝坊——魔法化妝廳」。家長可以加購配套,幫小朋友變身為華麗小公主。小朋友可以從七套獨家嘅公主裙中挑選一款,再配上皇冠、權杖、公主髮型等造型,喺不同背景前拍下奇妙時刻。小公主更可以登上公主寶座同製作個人化相簿或童話書,公主夢成真。迪士尼由即日起到十月三十一號仲推出「港人優惠」,以標準門票價享受兩次入園同其他優惠,有興趣嘅朋友可以留意吓!

Kelly Chu




hd