Executive日記——郊野加水站 行山不添膠

  呢個夏天好熱,但無阻Kelly同朋友去行山親親大自然!最近小妹收到好消息,喺水浪窩、北潭涌、蕉坑同清水灣大㘭門等一帶嘅行山地點加設咗「加水站」,方便一班行山友「補水」。Kelly提提大家,行山記得帶備水壺,唔好用膠樽呀,愛香港愛地球,添水不添膠!

  昨日環境局局長黃錦星喺facebook發文,話現在喺西貢一帶,水浪窩同北潭涌等行山地點已經增設加水機,多水少水冷水熱水有得揀。另外,喺北潭涌、蕉坑同清水灣大㘭門等地點則有漁護署郊野公園免費「加水站」。

  黃錦星話,近年聽山友反映,愈嚟愈多人支持郊遊「走塑」,尤其係減少即棄膠樽水,撐自己水壺自己帶,減廢減碳又保育。當中亦聽到有聲音建議政府喺可行地點增設「加水站」,以配合政府在郊野公園推廣「山野不留痕」文化,佢透露喺早前已經同漁護署署長同同事開會研究。

  有網民就喺佢嘅帖文留言,「政府部門活動可否帶頭不派小樽蒸餾水?將走塑文化推廣到社會,由政府內部做起」、「水機衞生情況點確保?」、「有GPS顯示水站位置就perfect了」,咁局長要聽下民意啦。

Kelly Chu


hd