Executive日記——星島校際辯論賽超勁 冠軍主辯做埋「超級狀元」

  一年一度學界盛事「星島全港校際辯論比賽」,歷年來培育出唔少辯論高手,對佢哋嘅學業、未來工作同日常生活都好有幫助!Kelly收到好消息,今屆DSE考獲八科「5**」嘅其中一名超級狀元黃瀚賢,就係去年「星島第33屆全港校際辯論比賽」中文組冠軍隊嘅主辯,佢無論辯論同學業都咁出色,NO.1尖子真係無得頂呀!

  聖保羅書院黃瀚賢喺四科主科加上化學、經濟、物理同數學延伸部份全部考獲「5**」,成為超級狀元。Kelly記得去年睇「星島第33屆辯論」總決賽時,已對呢位口才出色嘅同學留下好印象,佢唔止雄辯滔滔,仲好有幽默感,最後以主辯身份為聖保羅書院重奪失落多年嘅冠軍,真係好叻仔!

  能夠成功打入「星島辯論」總決賽已非泛泛之輩,黃瀚賢喺半決賽中已奪得「最佳辯論員」獎。黃瀚賢接受訪問時表示,自小鍾意睇法庭劇,對法律有興趣,所以希望報考港大工商管理學學士及法學士,將來可以喺法律界立足貢獻社會。

  「星島全港校際辯論比賽」培育出唔少社會人才,例如財庫局局長政治助理楊寶蓮(Pauline)曾經喺星島辯論比賽中奪獎,佢話喺辯論學到嘅知識同技巧,對佢喺學業、工作、日常生活等各方面都好有幫助!

Kelly Chu


hd