Executive日記——國際養生大師高雲著書授保青春秘訣

  香港書展又嚟啦!Kelly一直有睇《頭條日報》嘅專欄「懶人氣功」,跟白雁老師學番幾招強身健體,原來白雁老師媽媽係國際養生大師高雲,佢最近嚟咗香港介紹佢本新書《八十不老傳奇》。Kelly見到大師真係好羨慕,佢今年八十歲依然好青春,保持到S型嘅身材。

  今次小妹有幸一睹大師嘅風采外,仲同大師聊天,了解到原來大師同好多中港台名人都相識,好似導彈之父錢學深、香港影視大亨邵逸夫、台灣前行政院院長唐飛等等都曾經係大師嘅學生。大師仲話,原來佢早係三十幾年前已經喺香港出版過一本著作,對香港有感情。

  高雲大師面對眾多親友嘅離別,有感「萬般帶不走」,希望寫書介紹自己多年嚟對人生嘅感悟,同對養生嘅研究,以免呢啲有用嘅養生知識因此斷絕。

  佢以自己嘅人生為脈絡去介紹以醫入氣功、再由單純嘅氣功再綜合成能量養生研究嘅過程。大家一定唔可以錯過呢本深入淺出咁解釋俾您聽咩係「能量養生」嘅大作!

Kelly Chu


hd