Executive日記——總數多兩成回復前年水平! 可愛麻雀仔返嚟啦

  Kelly居於石屎森林,好珍惜喺城中見到雀仔嘅機會。香港觀鳥會(觀鳥會)公佈「全港麻雀普查2019」結果,顯示麻雀嘅數目較去年多咗兩成,回升至一七年嘅水平。觀鳥會相信上年麻雀少咗可能同天氣乾旱有關,而現時數字回升,麻雀又會飛近大家了!

  香港觀鳥會高級研究專員彭俊超博士仲話畀小妹知,去年異常乾旱會導致麻雀築巢育雛周期延遲。據香港天文台記錄,去年首五月累積雨量只得一百七十五毫米,而今年首五月累積雨量達六百八十毫米,係去年同期四倍。所以觀鳥會相信去年麻雀數字下跌是由於極端乾旱天氣所致,而今年麻雀數目回升至一六同一七年約三十萬隻嘅水平,顯示麻雀又活潑繁衍。

  麻雀多番,實在太好,因為香港嘅麻雀係Kelly嘅朋友,香港白鴿太怕人,麻雀就比較親近,如果人同鳥都可以好好相處就好了。觀鳥會仲提醒物管業如果怕鳥糞影響住戶,可以用臨時托盤放在鳥巢下,因為鳥巢係為咗養「鳥BB」,過咗繁殖季佢哋就會走。

Kelly Chu


hd