Executive日記——一張門票可參與兩大盛事 電玩節音樂節 精采活動多籮籮

  動漫電玩迷注意!「第二十一屆香港動漫電玩節」將於下星期五一連五日 (七月二十六日至三十日)喺灣仔會展中心舉行,場內將有好多限量品銷售,仲有連串精采活動,包括電競比賽同動漫設計比賽等。另一盛事「香港電競音樂節」亦同場舉行,一張門票就可參與兩大盛事,Kelly點會錯過!

  嚟電玩節點少得搶購心頭好,唔少參展商已相繼公佈限量商品,並配合實名登記制度。大會將於本周六上午九時三十分開始,喺麥花臣場館為展覽首天(二十六日), 首五百位入場人士預先進行實名登記,動漫迷憑大會發出嘅頭籌卡係動漫節首天,經過資料核對後按編號順序入場。

  大會承接往年舉辦多個比賽,包括「第二屆電競嘉年華」,有熱門手遊電競項目嘅邀請賽,仲有公開賽事畀公眾參加,獎金獎品合共超過港幣二十四萬!而第十屆香港原創動漫人型設計比賽,今年比賽主題為「武俠」,設公開組同學生組,畀漫畫界嘅明日之星一決高下。

  另一盛事,「香港電競音樂節」將於二十六日至二十八日同場舉行,最矚目嘅「動漫電競 Cosplay 大賽」再度掀開戰幔,屆時動漫Cosplayer將盛裝赴會,共聚一堂。而大會宣佈,只要購買其中一展嘅門票,就可以係同日免費參觀另一展覽,抵玩!

Kelly Chu


hd