Executive日記——首場展覽開幕 花牌藝術彰顯港特色 「設計光譜」進駐茂蘿街7號

  設計係創意工業嘅重要元素,Kelly走在潮流尖端,一直留意「香港設計中心」夥同市建局喺二級歷史建築「茂蘿街7號」設立嘅展覽場地,好開心知道作為大型設計企劃「設計光譜」(Design Spectrum)嘅活動起點。

  首場展覽「壹物——現代設計力」喺呢個周五起至九月八日喺「茂蘿街7號」舉行,聚焦亞洲設計如何運用自然物料嘅創新性為主題。「壹物」展品透過改進竹、木、紙三種傳統且常用嘅設計物料,具前瞻性地打破色彩、風格及物料應用的限制,從設計中改進傳統文化並帶來創新,探索現代化社會中亞洲設計嘅視覺文化及語言。

  小妹知道,呢個展覽邀請到曾獲多個國際設計獎項並獲選為「2017中國設計年度人物」嘅本港著名建築師、空間設計師及藝術家林偉而(William Lim)特別為「壹物」選用竹枝來打造一個大型花牌藝術裝置。林偉而話,竹是一種既環保又富靈活性嘅物料,常用於香港建築行業,最能代表香港的物料之一;而花牌喺香港文化中極具代表性,經常出現於傳統節日嘅慶祝活動。因此,佢受「設計光譜Design Spectrum」委約所創作嘅作品「花牌」以竹作為花牌裝置的設計物料,將兩者合二為一,向傳統竹棚紮作藝術及本土風俗文化致敬。

  「設計光譜」同時為設計愛好者及設計業內人士準備一系列免費工作坊及分享會,鍾意設計嘅朋友,一定唔可以錯過。

Kelly Chu


hd