Executive日記——「維港泳」新路線挑戰大 教練出招辨方向

        年度游泳盛事「新世界維港泳」,將於今年十月二十七日早上喺維港舉行。今屆賽事將採用全新路線,泳手要面對水流、風向等種種考驗,極具挑戰性㗎!Kelly訪問咗香港業餘游泳總會教練樊偉添同香港體育學院高級運動營養主任蕭沛霖,向泳手教路,其中一項,係喺海上扒水時,最好認住岸上一座高嘅建築物位置,咁就唔會游錯方向啦。

        本屆「維港泳」將採用全新路線,參與泳手會由灣仔金紫荊廣場公眾碼頭出發,以尖沙咀星光大道為終點。賽事設有「優悠組」、「競賽組」,同「國際組」。參賽名額較去年增加至四千人,規模仲係歷年之最。

  距離泳手備戰仲有兩個多月時間,樊偉添向泳手教路,落水後視野會受影響,上年好多泳手偏離比賽路線,迷失方向。佢建議泳手落水前以終點附近嘅大型建築物作為標記,以增加方向感。

  蕭沛霖就同Kelly講,訓練時間同非訓練時間喺飲食上並唔係有很大分別,最重要嘅係均衡飲食,確保身體有充足營養。至於比賽當日,佢建議至少在落水兩個小時前食早餐,畀身體有時間吸收能量,而份量上一份三文治同一杯飲品已經足夠。

  如參加者未持有泳總認可嘅相關游泳紀錄人士,必須通過大會九月進行嘅水試,方可參賽。凡十二歲或以上合資格泳手,由即日起至本月二十一日可登入網頁 https://www.hkharbourrace.com/online-application/?lang=hk,也可以郵寄或親身遞交表格至香港業餘游泳總會辦事處報名。

Kelly Chu


hd