Executive日記——同慈善團體膳心連基金合作 迪士尼剩食減浪費 變美食贈社區

  香港迪士尼樂園不單止提供精美餐飲,更懂得變魔術,化剩食為美食,送給有需要嘅人。迪士尼一向同慈善團體膳心連基金合作,喺度假區酒店嘅唔同餐廳收集安全剩食,再轉贈畀有需要人士,為環保出一分力。Kelly昨日更同一百六十位小朋友同家長試食剩食自助餐,發現同樣美味!

  迪士尼同膳心連合辦剩食再造活動 「Cookie與小廚師『盛』夏派對」,邀請來自庭恩兒童中心嘅受助家庭同小朋友,齊齊同Cookie一齊學習珍惜食物、減少浪費。原來香港每日有三千六百公噸食物被棄置喺堆填區,其中只有百分之一可以被回收,真喺好浪費!由一四年至今,膳心連已經喺迪士尼收集超過六十公噸食物、提供超過十四萬個膳餐。大家唔好以為剩食一定唔衛生,迪士尼提供嘅剩食符合安全標準,用雪櫃車以最短時間送到附近社區中心同小學。

  迪士尼酒店行政總廚麥錦駒建議,大家喺屋企,可以用水果配搭咖喱、白飯用作炒飯、魚骨同菜葉用來煲湯,健康又美味。參與活動嘅鄭宇欣小妹妹就同Kelly講,爸爸媽媽同老師都會教佢珍惜食物嘅重要性,平時食飯時,會「食幾多,夾幾多」,吃剩嘅白飯,媽媽第二日會用來煲粥,不會浪費。「今次喺迪士尼學識用剩食製作可愛嘅Cookie小蛋糕,可以返學校教其他同學仔!」

KellyChu


hd