Executive日記——反地心吸力舞步 寓意人生起伏 法舞蹈家獻藝鼓動人心

  呢排香港發生好多事,好影響大家嘅心情,係時候去睇演藝節目,放鬆吓心情。Kelly知道鰂魚涌太古坊嘅ArtisTree將會喺下個月請來一嘅法國舞蹈家,演出反地心吸力嘅舞步,睇完或者有助大家嘅心情唔好再沉落去,起到一啲鼓舞作用。

  太古坊嘅ArtisTree經常舉行一啲別出心裁嘅演藝節目,等喺附近寫字樓上班嘅朋友,可以喺中午一邊睇節目一邊食飯,或者放工後進入藝術世界,暫忘工作嘅忙碌。

  聽太古地產朋友講,法國著名編舞家Yoann Bourgeois將會喺九月十九日至二十八日多個不同時段,表演名為TENTATIVE APPROACHES TO A POINT OF SUSPENSION嘅現代舞。

  Kelly睇過啲介紹片段,Yoann Bourgeois走上一條樓梯,徐徐墮下,觸及一張彈牀後,成個人又回彈番樓梯之上,好似不受地深吸力牽引咁樣,更神奇係佢好似無跌倒過,迅速反彈,一啲事都無發生咁。小妹睇吓睇吓,就覺得佢好似想講人生,都有跌宕起伏,最終都會回復正軌,好積極、好勵志。

  所以話,現代舞有深意,超越語言、世代與文化的界限。聽講佢仲會喺舞台上豎立高聳嘅人體不倒翁雕像、設置配備彈牀嘅巨型旋轉樓梯,表演好精采,曾引起全世界同網絡上數百萬人議論。大家想睇,可以上ArtisTree網上購票。

Kelly Chu


hd