Executive日記——如何與不同政見家人相處 第二屆女人節講座有心思

  上年第一屆女人節,以頌揚女性力量和個性為主題,引起好多女士興趣。第二屆女人節由今日起至九月一日舉行,期間有超過五十個透過各種藝術形式頌揚女性嘅活動!當中仲加入咗與最近反修訂《逃犯條例》有關嘅講座,相當有心思,好似教大家如何與不同政見家人相處,正係好多家庭主婦嘅煩惱問題。

  第二屆女人節由不同主題嘅音樂live show、放映會、身心健康體驗,到啟發思維嘅專題討論及工作坊等,等大家可以以女性嘅經歷與角度探討女性嘅多種重要議題。

講座宣揚非暴力溝通

  Kelly覺得有幾個講座好切合當下女士需要,第一個係講座由非暴力溝通實踐者者劉劍玲主講「如何與不同政見家人相處」,啱晒一家人去聽吓,減少屋企內嘅爭議。另一個講座,由創傷及關係治療師Karina CALVER講「愛人與自愛:如何和情緒病人談戀愛」,題目好特別。仲有一個講座好啱現代女性聽,就係由香港婦女中心協會總幹事廖珮珊主講嘅「木不合格的女人?離婚姊妹分享會」。

  睇嚟女人節除咗有娛樂和生活知識活動,仲有好多實用資訊嘅分享。活動詳情︰https︰//womensfestival.hk/

Kelly Chu


hd