Executive日記——下月回中大與師弟妹交流 陳德霖大學時期情繫圓形球體

  唔講唔知,原來金管局總裁陳德霖(Norman)喺中文大學讀書嘅時候,凡係圓嘅嘢,佢都好感興趣,仲為咗一個個圓形嘅物體,不惜每朝早六點半起牀出門,想知佢點解情繫圓形,大家要留意呢位崇基書院畢業生名人將於下個月初回母校與師弟妹交流嘞。

  陳德霖應中大邀請,將會參與「傑出校友訪問計劃2019」,喺十月三至五日回校與一眾「中大人」多次交流。中大特登為呢位名人校友拍咗一段宣傳片,披露Norman讀書時,佢逢圓形嘅物體都會感興趣,原來係指足球、籃球同排球。

  佢仲講當年只有新亞同聯合書院有室內球場,崇基係冇嘅,所以崇基排球隊就要一早起身練波,因為六點半先至無蚊,而且球場係石屎地,周地碌,成身損晒,但Norman樂在其中,體會到排球隊嘅大搥手幾勁都好,無二傳手起球都無用,所以最重要係team work。

  佢仲分享,有同學曾問佢讀社會學同經濟學為何去做咗金管局?Norman話根本係要靠後天努力,因為打工後就不可以返校園再讀,佢嘅心得係「唔好畀大學讀嘅嘢局限自己發展嘅範疇,世界係好大嘅」。佢又建議大學生要一步步達到自己嘅理想,要爭取、準備,理想先至唔會變成妄想。

Kelly Chu


hd