Executive日記——日本藝術專家珍惜收藏 奈良美智珍品 超級粉絲攬過世

  日本現代藝術家奈良美智喺一張滙豐銀行百元鈔票上畫公仔,日前喺灣仔展覽中心嘅蘇富比秋季拍賣會上,以天價四十五萬港元拍出,好多藝術收藏家非常雀躍,其中包括新藝潮總監邢珠迪,因為佢都擁有奈良美智嘅簽名品,佢話係緣份而來,所以好珍惜,唔會出售咁話。

  邢珠迪係《頭條日報》嘅專欄作家,本身係一名日本通,經常介紹日本新事物,佢仲係日本現代藝術專家。佢同Kelly講,奈良美智嘅滙豐紅衫魚以天價拍出,令好多藝術愛好者驚奇,因為張鈔票只係加上手繪,唔係一件正式藝術作品,估唔到喺現時經濟環境,竟以天價成交,證明日本現代藝術品有價有市。

  邢珠迪知道呢個消息之後,即刻搵番自己收藏嘅奈良美智明信片,上面有佢嘅簽名,係一次因緣遭會而獲得。其後,佢有次再遇奈良美智,想佢喺一份場刊上簽名,佢本人願意,但助手就拒絕咗!邢珠迪仲畀Kelly睇佢收藏村上隆得意門生Mr.的手繪漫畫,原來珠迪同Mister好friend,佢話呢幅漫畫同奈良美智嘅簽名都好有紀念價值,永遠收藏,不會出售。

  秋季係藝術品拍賣季節,邢珠迪話十一月一至四日新藝潮會喺PMQ舉辦嘅「第三屆新藝潮博覽會(ART NEXT Expo)」,邀請藝術家親自參加及駐場,提供藝術家、收藏家與一眾藝術愛好者一個直接交流及交易嘅平台,係一個與眾不同嘅藝展,啱晒藝術愛好者同業界人士參與。

Kelly Chu


hd